La Traviata. Giuseppe Verdi.

Oper.

Theater Basel.

Radio DRS-1, Regionaljournal Basel, 7 von 7, 9. April 1991.

 

 

Es isch scho merkwürdig, wie Lüt, wo üsi volli Bewunderig hei, u wo mir sogar echley schaluus uf se sy, wie die Lüt ihres Läbe sälber ganz anders aluege. Der alt Goethe het zum Byspiel mit 80gi gseit, är syg i sym ganze Läbe zämezellt nid meh als vier Wuche glücklech gsy. – E truurigi Bilanz für son es erfolgrychs Schriftstellerläbe. Uf der andere Syte isch die Bilanz für üs gwöhnlichi Lüt ou grad e Trost. Es isch am Goethe nid bsser gangen als üs. Syni Berüemtheit het ihm nüt gnützt. Wär hüt eso ne Trost bruucht, dass es andere nid besser geit, dä cha jetz im Theater Basel d Traviata ga luege. Da zeigt me rychi, schöni Lüt uf der Bühni. E Frau wie Milch u Bluet, ganz Paris liegt zu ihrne Füesse, mit dem Geld von de Liebhaber wohnt sie im feinste Quartier – aber die schöni Frau kennt d'Liebi nid. I ihrem Herz isch sie einsam. Und wo ändlech der füürig Jüngling chunnt, wo sie zur Einsamkeit use rysst, da chunnt ou scho der Tod mit der Sägesse u schnydt der Läbensfade von der schöne junge Frou ab. Bilanz: I ihrem ganze Läbe sich sie zämezellt nid meh als vier Wuche glücklich gsy.

 

Die tragische Gschicht, wo für üs gwöhnlichi Lüt aber ou e Trost isch, die Gschicht verzellt der Giuseppe Verdi i syre erfolgrychschte Opere "La Traviata". Sie het gester am Abe im Theater Basel Premiere gha. Und wo die berüemtisti Tuberkulosekranki von der Operegschicht gester am Abe ihres Läbe usghuuchet het, isch glychzytig uf der Bühni der Theaterstil von de 50er Jahr uferstande. Statt modernem Regietheater, wie me's isch gwahnet gsy, gseht me jetzt wieder die alti, konventionelli Opereroutine uns der Zyt von üsne Väter u Grossväter: Théâtre à papa. Vor Freud über die Uferstehig isch ds Publikum a der Premiere us em Hüsli grate und het gklatschet u Bravo grüeft wie scho sit langem nümm. Offebar het die "Traviata" für vieli Zueschauer en ächte Glücksmoment botte.

 

[Absage: Hinweis auf das ausführliche Gespräch in der Abendsendung]

Die Stimme der Kritik für Bümpliz und die Welt [-cartcount]